Әрбір халықтың болашағы мен тұрақтылығы оның өскелең ұрпағына беретін тәлім-тәрбиесімен, бойына сіңіретін ұлттық құндылықтарымен өлшенетіні хақ. «Ұлттық рух – ұрпаққа аманат» деген қасиетті ұғым бабалардан қалған асыл мұраны көздің қарашығындай сақтап, келешекке жеткізудің асқақ жауапкершілігін жүктейді. Бүгінгі жаһандану дәуірінде әрбір жас заман талабына сай білім алып қана қоймай, өз түп тамырын мақтан тұтуы тиіс. Себебі тамырын тереңге жайған ағаш қана дауылға төтеп бере алатыны сияқты, ұлттық құндылықтарын берік ұстанған ел ғана еңсесін тік ұстайды. жас буын – ертеңгі ел тізгінін ұстайтын болашақ иелері. Олардың санасында отаншылдық сезімін, ұлттық мақтанышты ояту арқылы біз мықты мемлекет іргетасын қалаймыз. Ұлттық өнерді дәріптеу, ана тілінде еркін сөйлеу, қазақтың күйі мен жыр-дастандарын жадында сақтау – жастардың рухани байлығын арттыратын басты қадам. Ата-бабамыз бізге кең байтақ жерді аманат етіп қана қоймай, сонымен бірге бірлік пен татулықты, адамгершілік пен кісіліктің биік үлгісін мұра етіп қалдырды. Сол қасиетті аманатқа адал болу, оны жаңа биіктерге көтеру – әрбір саналы қазақстандықтың міндеті. Ұлттық рух биік болған жерде береке де, бірлік те, даму да қатар жүреді. Рухани жағынан мықты ұрпақ қана кез келген сын сағатта елдің сенімді тірегі бола алады. Осы орайда өскелең ұрпақтың жүрегіне ұлттық құндылықтардың дәнін себіліп, ата-бабамыздан жеткен асыл мұраны жаңғырту – бүгінгі күннің ең маңызды міндеттерінің бірі. Осы бір игі мақсатты ту еткен Шымкент қаласының 7-9 сынып оқушылары мен «Дәстүр мен таным» үйірмесінің мүшелері қатысқан тағылымды шара өңірімізде ерекше рухта өтті. Рухани кештің шымылдығы халқымыздың әуезді «Үкілі қыз» әнімен түріліп, жиылған қауымға ерекше көтеріңкі көңіл күй сыйлады. Шараның мазмұнын тереңдете түскен Әдеп-ғұрып және салт-дәстүр орталығының маманы Ләззат Ретбекқызы жас ұрпақ тәрбиесінде ұлттық құндылықтардың орны ерекше екенін айтып, ата-баба жолын ардақтаудың маңызы туралы ой қозғады. Бұл кездесу жай ғана мереке емес, жүректерге ұлттық мақтаныш сезімін ұялатқан нағыз таным мектебіне айналды. Сонымен қатар, қазақ халқының тұрмыс-салты мен жоралғыларын жанды түрде көрсеткен «Сүйінші, бата» тақырыбындағы сахналық көрініс көрермендердің ыстық ықыласына бөленді. Ұлттық өнерсіз қазақ рухын елестету мүмкін емес. Кеш төрінде ұлы күйші Құрманғазының асқақ «Адай» күйі орындалып, қатысушылардың ұлттық өнерге деген сүйіспеншілігін оятты. Ал кеш соңында шырқалған әсем де әсерлі «Гүлдерайым» әні бүкіл жиынға ерекше шуақ пен жылулық сыйлады. Мұндай мазмұнды да әсерлі кездесулер – жас ұрпақтың тарихқа, ата-баба мұрасына деген құрметін арттырып қана қоймай, ұлттық сананы қалыптастырудың басты тетігі. Ғасырлар бойы қалыптасқан асыл құндылықтарымыз өскелең жастың еншісімен ұрпақтан-ұрпаққа жалғаса бермек!
Ұлттық рух – ұрпаққа аманат: «Дәстүр мен таным» кешінен бір үзік сыр
