Қазіргі күнде нашақорлар туралы жиі айтамыз, жиі кездестіреміз. Баспасөз беттерінен оқимыз. Таныстарымыздың отбасында есірткінің кесірінен болып жатқан қайғылы жағдайлар туралы да естиміз. Ең қорқыныштысы – ол нашақорлықтың тұсауына түсетіндердің көбі жастар. Есірткі қолданушылардың негізгі тобын 14-30 жас аралығындағы жастар құрайды екен. Нашақорлық – есірткі құрамдас немесе психотроптық, яғни оларға ұқсас заттарға тәуелділіктен туындайтын организмнің аса ауыр және тұрақты тәндік, психикалық өзгеруіне, бұзылыстарына, кейде өлімге әкелетін дерт. Есірткі заттары – денсаулыққа ғана зиян тигізіп қана қоймайды, олар адамның жеке тұлғасына нұқсан келтіреді. Есірткі қолдану жастардың бос уақытындағы айналысар ермегіне айналған. Барлық жаңа клубтарды, би алаңдарын, оқу орындарын, аулаларды есірткі буы жаулап алып жатыр. Нашақорлық мәселесін шешу бүгінде бүтін бір қоғамның өзекті мәселелерінің бірі болып отыр. Қазіргі таңда көптеген дәрі-дәрмектік бағдарламалар және есірткіге тәуелділіктен арылтатын рухани тәжірибелерде аз қолданылып жатқан жоқ. Елімізде нашақорлықтың көрсеткіші жыл сайын артып келеді. Мамандардың айтуынша, есірткі өнімдерін тұтынатындардың қатарында тек ересек ерлер мен әйелдер ғана емес, жасөспірімдер де бар. Ресми статистика өсті дегенмен, нашаға тәуелді азаматтардың есепте тұрмайтыны қаншама… Мамандар бүгінде психотроптық заттарды қабылдаушылар мен саудалаушылардың да саны артпаса, кемімей тұр деп дабыл қағуда. Соңғы он жылда әлемде нашақорлар саны 22 пайызға артқан. Жалпы 275 миллионға жуық адам есірткіге тәуелді. Бұл өсімнің нәтижесі, жыл сайын 500 мың науқастың өліміне себепші болып отыр. Ал, еліміздегі жағдайға келсек, 18,5 мың қазақстандық нашақорлықпен есепте тұр. Оның 1,5 мыңға жуығы әйел адамдар. Мамандардың сөзінше, 19 миллион халқы бар Қазақстан үшін бұл көрсеткіш үлкен қауіп төндіреді. Осы орайда Шымкент унив ерситетінде жастар арасында нашақорлықтың алдын алу мақсатында кездесу өтті. Кездесуге:
— “Жастар ресурстық орталығы” КММ-нің басшы орынбасары Аружан Русланқызы Әлжан;
— Шымкент қалалық Полиция департаменті Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі, полиция майоры Бауыржан Қанатұлы Карбеков;
— Шымкент қаласы Психикалық денсаулық сақтау орталығының психиатр-наркологы Ұлбосын Елтаевна Жанмолдаева қатысты. Кездесу барысында мамандар нашақорлықтың адам денсаулығына, психикасына және қоғамға тигізетін зиянын жан-жақты түсіндірді. Сондай-ақ, кездесуде айтылған мәліметтер бойынша қорытынды сұрақтарға жауап берген жастарға ынталандыру сыйлықтары табысталды.
Jsk ақпараттық агенттігі