• 29 ноября, 2025 7:44 пп

ЖАҢАРУ КҮНІНДЕГІ ЖАҒЫМДЫ ҮРДІС

Автор:admin

Ноя 21, 2025

Наурызнама онкүндігінің Жаңару күніне орай, Ордабасы ауданының мемлекеттік қызметшілері мен жергілікті тұрғындары жаңадан салынған спорт кешенінің алдына ағаш көшеттерін егу жұмыстарын жүргізіп, 100 түп арша, 1000 дана қарағаш көшеттерін отырғызды. Одан бөлек, бұл үрдіс ауыл округтерінде де жалғасты. Нәтижесінде іс-шараға қатысушылар жалпы саны 8200 қарағаш пен жеміс ағаштарын екті.

Игі шараға ауыл тұрғындары асқан белсенділікпен, жаппай атсалысты. Аудан әкімінің тапсырмасына сәйкес, отырғызылған ағаштардың күтімі және ауданымыздың көгалдануы басты назарда болуы қажеттігі түсіндірілді.

Жаңару күні аясында ұйымдастырылған бұл экологиялық бастама – тұрғындардың табиғатқа деген жанашырлығын арттырып қана қоймай, өскелең ұрпаққа үлгі боларлық игі дәстүрге айналып келеді. Әсіресе жастар мен оқушылардың белсенді қатысуы оларды туған жердің көркеюіне үлес қосуға баулып, табиғатты аялау мәдениетін қалыптастыруға ықпал етті. Іс-шара барысында қатысушыларға ағаш көшеттерінің түрлері, оларды дұрыс отырғызу мен баптау жолдары туралы түсіндірме жұмыстары да жүргізілді.

Сонымен қатар, аудан тұрғындары биылғы Наурызнама онкүндігін табиғатты түлету, жаңаша серпін беру кезеңі ретінде қабылдап, әр ауыл округінде көгалдандыру жұмыстарын жүйелі түрде жалғастыруды жоспарлап отыр. Тұрғындар мен мемлекеттік қызметшілердің бірлескен еңбегі ауданның экологиялық ахуалын жақсартуға, көшелердің сәнін арттыруға және болашақта жасыл желектің көбеюіне негіз болмақ. Бұл – Ордабасы халқының бірлігін, табиғатқа деген қамқорлығын айқын көрсеткен жарқын үлгі.

 

Jsk ақпараттық агенттігі

Автор: admin