Президент Қасым-Жомарт Тоқаев: «Еңбек адамы – елдің тірегі, қоғамның рухын көтеретін шынайы қаһарман. Халыққа адал қызмет етіп, өз ісіне берілген әр азамат – Қазақстанның жарқын болашағының кепілі».
Адамның өмірлік жолындағы ең қастерлі қасиет – адал еңбек ету. Маңдай терімен еткен еңбегі еленген жан ғана елінің алғысына бөленеді. Солардың бірі – Ордабасы ауданының Қараспан ауылында туған, еңбекқор әрі жауапкершілігі мол азамат Алайдаров Абай Мырзаханұлы. Ол қарапайымдылығы, адалдығы және ізгі ниетімен әрбір адамға үлгі.
Абай Мырзаханұлы 1992 жылы Шұбар ауылындағы училищені тәмамдап, тракторшы мамандығын игерді. Жас кезінен еңбекке бел буып, өз ісін тиянақты орындауды үйренді. Бүгінде ол 2 ұл мен 2 қыз тәрбиелеп отырған үлгілі әке әрі отбасына қамқор жан. Тәрбиелі отбасысы – оның жеке өміріндегі басты құндылығы әрі өмірлік ұстанымы.
2010 жылдан бастап Абай Мырзаханұлы «Темірлан абаттандыру» коммуналдық мемлекеттік мекемесінде адал еңбек етіп келеді. Бүгінде ол тракторшы қызметінде. Өзі қызмет ететін сала – ауыл мен ауданның көркеюіне, көше мен аулалардың абаттануына бағытталған. Абай Мырзаханұлының еңбегімен ауылдың көше-жолдары реттеліп, қоғамдық кеңістіктер көркейіп, елді мекеннің бейнесі айқын өзгеріске ие болды. Оның бұл еңбегі – тек техникалық қызмет қана емес, ауыл халқының өмір сапасын арттыруға қосқан зор үлесі.
Абай Мырзаханұлының қарапайым, бірақ жауапкершілігі мол еңбегі қоғамға үлгі. Ол өз мамандығына беріліп, ауданның игілігі үшін 15 жылдан астам уақыт бойы талмай еңбек етті. Оның қолынан шыққан жұмыстар ауылдың ажарын ашып, тұрғындарға жайлы орта қалыптастырды. Әрбір көше, әрбір абаттандырылған аула – оның адал еңбегінің айқын көрінісі.
Қарапайым еңбегімен елінің құрметіне бөленген Абай Мырзаханұлы сияқты азаматтар – қоғамның тірегі, өскелең ұрпаққа өнеге. Олар елді сүйген, өз ісіне берілген шынайы еңбек адамдар. Мұндай еңбек адамының еңбегі еленіп, бағалануы – қоғамның мәдениеті мен адамгершілік құндылығының айқын көрінісі.
Еңбек адамының әрбір әрекеті – тек жеке жетістігі ғана емес, бүкіл қоғамның гүлденуіне қосқан үлесі. Абай Мырзаханұлының өмірлік ұстанымы мен адал еңбегі – елдің мақтанышы, ауданның өркендеуіне жол ашқан нақты мысал. Осындай азаматтардың арқасында елдің әлеуметтік өмірі тұрақты, қоғамдық орта жайлы әрі көрікті болады.
Jsk ақпараттық агенттігі.