Шымкент қаласының инфрақұрылымын жаңғырту, шеткі шағынаудандар мен тұрғын үй алаптарын абаттандыру және бұқаралық спорт пен балалардың қауіпсіз демалысын қамтамасыз ету бағытындағы жүйелі жұмыстар өз нәтижесін беруде. Осы орайда, Тұран ауданына қарасты Ақтас шағынауданында жергілікті тұрғындардың қуанышын еселеген маңызды оқиға өтті: мұнда заманауи балалар ойын алаңы салтанатты түрде пайдалануға берілді.
Бұл нысан – тұрғындардың тұрмыс сапасын арттырып, шағынаудан ажарын аша түскен кезекті әлеуметтік-инфрақұрылымдық жобалардың бірі.
Ақтас шағынауданында бой көтерген жаңа ойын алаңы барлық заманауи талаптар мен қауіпсіздік стандарттарына толық сай келеді. Бүлдіршіндердің бос уақытын тиімді әрі белсенді өткізуі үшін мұнда барлық жағдай жасалған. Жаңа нысанның ашылуында шағынаудан тұрғындары, жергілікті ақсақалдар мен жастар бас қосты. Ауыл қариялары Ақ батасын беріп, ел амандығы мен жас ұрпақтың жарқын болашағына тілектестік білдірді.
«Бұрын балаларымыз көшеде, жолдың бойында ойнауға мәжбүр еді. Ал енді, міне, өз ауламызда барлық жағдайы жасалған, қауіпсіз әрі әдемі алаңымыз бар. Балалардың қуанышында шек жоқ. Осындай игі іске ұтқырлық танытқан азаматтарға ризашылығымызды білдіреміз», — деді Ақтас шағынауданының тұрғындары.
Тұран ауданы әкімдігі өкілдерінің айтуынша, шағынаудандарды абаттандыру, балалар мен спорт алаңдарын салу жұмыстары мұнымен тоқтамайды. Бекітілген кешенді жоспарға сәйкес, аудан аумағындағы басқа да шеткі тұрғын үй алаптарында осындай заманауи нысандарды кезең-кезеңімен пайдалануға беру көзделген.
Балалардың күлкісі мен тұрғындардың жайлылығын басты орынға қойған бұл бастамалар Ақтас шағынауданының көркіне көрік қосып, тұрғындардың ауызбіршілігін арттыра түспек.
«Халық қатысатын бюджет» жобасы аясында 400 шаршы метр аумақ абаттандырылып, заманауи ойын және воркаут алаңдары, жарықтандыру жүйесі орнатылды.
Құрылыс жұмыстары тамыз айының басында басталып, белгіленген мерзімде аяқталды. Нысанға 3 жылдық кепілдік берілген.
Тұрғындар жаңа алаңның ашылуына қуанып, оның игілігін пайдалану және тазалығын сақтау жауапкершілігін өз мойындарына алуға дайын екендерін жеткізді.