Идея авторы Қуатбек Тортаев ұсынған «DALA SOUND» жобасы ұлттық дәстүр мен заманауи музыканы үйлестірген ерекше мәдени кеш ретінде көрерменге жол тартты.
10 мамыр күні Шымкент қаласындағы Шәмші Қалдаяқов атындағы облыстық филармонияда өткен ашық аспан астындағы музыкалық кеш қала тұрғындары мен қонақтарына ұмытылмас әсер сыйлады.
Кештің басты ерекшелігі — дәстүрлі өнер мен заманауи музыкалық бағыттардың бір сахнада үндесуі болды. Жоба аясында «SHAUGAR» этно-ансамблі мен Камералық оркестр бірлесіп өнер көрсетіп, көрерменге өзгеше музыкалық атмосфера сыйлады. Домбыра үні мен камералық музыканың үйлесімі ұлттық әуендердің жаңа сипатта жаңғыруына мүмкіндік берді.
Кеш қонақтары концерт басталмас бұрын қызыл кілеммен салтанатты түрде қарсы алынды. Арнайы ұйымдастырылған фуршет пен жанды музыка кештің сәнін келтіріп, ашық аспан астындағы рухани кештің көркін аша түсті.
Концерт барысында қазақ композиторларының таңдаулы шығармалары, халық күйлері және заманауи этно-композициялар орындалды. Музыкалық бағдарлама көрерменді ұлттық өнердің терең әлеміне жетелеп, дәстүрлі мұраның бүгінгі заманмен үйлесе алатынын айқын көрсетті.
«DALA SOUND» жобасы ұлттық мәдениетті жаңа форматта насихаттауға бағытталған шығармашылық бастама ретінде көпшіліктің ыстық ықыласына бөленді. Кеш көрерменге тек концерттік бағдарлама ғана емес, рухани әсер мен эстетикалық ләззат сыйлаған ерекше мәдени оқиға болды.