Бүгін Қаратау ауданындағы Ю. Сареми атындағы №107 мектеп-лицейде орналасқан №250 сайлау учаскесінде таңертеңнен бері ерекше ахуал қалыптасты. Мұнда дауыс беру процесі тыныш әрі ұйымдасқан түрде өтіп, азаматтық жауапкершілік сезімі айқын байқалды.
Сайлауға өзбек этносының өкілдері ерекше бастама көтеріп, шамамен 20 тұрғын дауыс беруге қазақтың дәстүрлі ұлттық киімдерін киіп келді. Бұл әдемі бастама қазақ халқына, оның мәдениеті мен салт-дәстүріне деген шынайы құрметтің көрінісі болды. Сонымен қатар бұл Қазақстанда тұратын түрлі этнос өкілдерін біріктіретін достық пен өзара сыйластықтың символына айналды.
Жарқын ұлттық киімдер бүгінгі күнге ерекше салтанат сыйлап, қоғамымыздың басты құндылығы – бірлікті тағы бір мәрте айшықтай түсті. Бір сайлау учаскесінде тағдыры мен ұлты әртүрлі адамдар қатар тұр. Алайда олардың барлығын ел болашағына деген ортақ жауапкершілік біріктіреді.
Қазақстан – баршаға ортақ шаңырақ. Мұнда бір-бірінің мәдениеті мен салт-дәстүріне құрметпен қарау қоғамдық келісімнің, өзара сенім мен тату көршіліктің негізіне айналған.
Бүгін №250 сайлау учаскесіндегі дауыс беру азаматтық борышты орындаумен қатар, құрмет, бірлік пен елге деген сүйіспеншіліктің қарапайым әрі шынайы істерден көрінетінінің жарқын мысалы болды. Өйткені бүгін – Қазақстан тарихында алғаш рет өтіп жатқан Құрылтай сайлауы өтетін тарихи күн.
Учаскелік сайлау комиссиясының төрағасы Имамсидиков Нодирханның айтуынша, аталған учаскеге барлығы 2179 сайлаушы тіркелген. Қазіргі уақытта олардың 1800-ден астамы өз азаматтық таңдауын жасап үлгерген.