Бәйдібек ауданы әкімдігінде «Ауыл» партиясының қатысуымен кеңейтілген мәжіліс ұйымдастырылып, аграрлық саладағы маңызды мәселелер мен жаңа бастамалар кеңінен талқыланды. Жиынның негізгі мақсаты – Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауындағы аграрлық салаға қатысты басым бағыттарды түсіндіру, сондай-ақ аудан шаруаларының өзекті мәселелерін нақты тыңдауға арналды.
Жиынға Қазақстан Республикасы Парламенті Мәжілісінің депутаты, Аграрлық мәселелер комитетінің төрағасы, «Ауыл» партиясының төрағасы Серік Егізбаев, аудандық мәслихат депутаттары, ауылдық округ әкімдері, агроқұрылым иелері мен кәсіпкерлер, сондай-ақ сала басшылары қатысты. Бұл жиын ауыл шаруашылығы саласындағы мемлекеттік саясатты түсіндіру және жергілікті шаруалармен тікелей диалог орнату мақсатында ұйымдастырылды.
Аудан әкімінің міндетін атқарушы Бақыт Қырғызәлиев кездесуді ашып, ауыл шаруашылығының ел экономикасы мен азық-түлік қауіпсіздігінде алатын орнына тоқталды.
– «Мемлекет басшысы атап өткендей, ауыл шаруашылығын дамыту – ел экономикасының тұрақтылығы мен азық-түлік қауіпсіздігінің басты тірегі. Осы бағытта ауданымызда нақты жобалар жүзеге асырылып келеді. Бүгінгі жиын осы жұмыстарды жүйелеуге және жаңа бастамаларды қолдауға мүмкіндік береді», – деді ол.
Серік Егізбаев ауыл шаруашылығы саласындағы мемлекеттік саясаттың жаңа бағыттарын таныстырды. Оның айтуынша, аграрлық бизнесті цифрландыру, жаңа технологияларды енгізу және фермерлерді қолдау шаралары – саланы дамытудағы басты басымдықтардың бірі.
– «Бүгінде ауыл шаруашылығында цифрлық технологияларды қолдану арқылы өндіріс тиімділігін арттыруға, өнім сапасын жақсартуға, логистика мен нарыққа шығуды оңтайландыруға мүмкіндік бар. Біз жас кәсіпкерлерді қолдауды күшейту, субсидия беру тетіктерін жетілдіру арқылы агроөнеркәсіпті одан әрі дамытуға дайынбыз», – деді Серік Егізбаев.
Жиында аудан экономикасының дамуына арналған бейнематериал көрсетілді. Онда жас кәсіпкерлер мен аудан шаруаларының тың жобалары таныстырылып, тәжірибелік мысалдар келтірілді. Мысалы, М.Күлішов өзінің «Үйрек фермасы» жобасын таныстырды. Ол бірнеше жылдан бері үйрек өсіруді қолға алғанын айтып, жаңа технологияларды енгізу арқылы өнім сапасын жақсартуға және шығынды азайтуға қол жеткізгенін жеткізді.
– «Біздің ферма қазіргі кезде 200-ден астам үйректі қамтиды. Жаңа әдістер мен цифрлық бақылау жүйесі өнімділікті арттыруға септігін тигізді. Енді біз өңірлік нарыққа тұрақты өнім жеткізіп, экспорттық әлеуетімізді кеңейтуге дайынбыз», – деді ол.
Сондай-ақ, Е.Қамбар «Қоян бағы» жобасын таныстырды. Жоба ауыл шаруашылығын әртараптандыруға бағытталған. Қамбар қоян өсіру арқылы ауылда қосымша жұмыс орындарын ашуға, өнімнің өзіндік құнын төмендетуге және жастардың кәсіпкерлікке қызығушылығын арттыруға ниет білдірді.
Т.Надирханов «Бөдене шағын фермасы» жобасы арқылы шағын және орта фермерлік кәсіпкерлікті дамыту тәжірибесін бөлісті. Ол жобаны іске асыруда мемлекеттік субсидияның маңызды екенін айтып, қолдау бағдарламаларын жеңілдету қажеттігін атап өтті.
Е.Күлішов «Күркетауық фермасы» жобасын таныстырып, ауыл шаруашылығында инновациялық технологияларды енгізудің тиімділігін көрсетті. Ол қазіргі таңда фермада автоматтандырылған жем беру жүйесі, климат бақылау және сандық есеп жүргізу жүйелерін қолданатынын айтты.
Мәжіліс барысында жергілікті шаруалар ауыл шаруашылығына субсидия беру тетіктерін жетілдіру, жас кәсіпкерлерге арналған мемлекеттік қолдау бағдарламаларын жеңілдету, сондай-ақ өнім өткізу нарықтарын кеңейту мәселелерін көтерді. Фермерлер өз тәжірибелерін бөлісіп, өндірісті тиімді жүргізу жолдарын, жаңа технологияларды енгізудің артықшылықтарын баяндады.
– «Бізге арналған мемлекеттік қолдау бағдарламаларын қарапайым әрі қолжетімді ету қажет. Сонда ғана жас фермерлер өз жобаларын дамытып, экономикалық тұрғыдан тұрақты бола алады», – деді ауданның бір фермері.
Көптеген қатысушылар агроөнеркәсіптік өнімді өңірлік және республикалық нарыққа шығару жолдарын талқылады. Олардың пікірінше, қазіргі таңда өнімді өткізу нарықтарын кеңейту, логистикалық инфрақұрылымды жетілдіру, цифрлық платформалар арқылы онлайн саудаға шығу – маңызды міндеттердің бірі болып отыр.
Мәжіліс барысында «Ауыл» партиясының жұмыс тобы шаруалардың сауалдарына жауап беріп, алдағы уақытта көтерілген ұсыныстарды республикалық деңгейде қарауға уәде етті. Кездесу өзара пікір алмасу, жаңа жобаларды талқылау және ауыл шаруашылығын жетілдіру бағытындағы тиімді ұсыныстармен қорытындыланды.
Аудан әкімдігі алдағы уақытта аграрлық саланы цифрландыру, жас кәсіпкерлерге қолдау көрсету, өнім өткізу нарықтарын кеңейту бойынша нақты қадамдар жасауды жоспарлап отыр. Сонымен қатар, аудан шаруалары мен кәсіпкерлер арасында тәжірибе алмасу мен ынтымақтастық нығая түседі деп күтілуде.
Ауыл шаруашылығын дамытудағы мұндай кездесулер фермерлердің мәселелерін нақты жеткізуге, шешім қабылдаушыларға ұсыныстар жасауға мүмкіндік береді. Сонымен қатар, жаңа технологияларды енгізу, агроөнеркәсіп өнімдерінің сапасын арттыру және нарыққа шығуды оңтайландыру бағытында нақты шешімдер қабылдауға жол ашады.
Кездесу ауыл шаруашылығын дамытуға бағытталған жүйелі жұмыстардың жалғасы ретінде қарастырылып, ауданның экономикалық дамуына елеулі үлес қосады. Жергілікті шаруалар мен жас кәсіпкерлердің ұсыныстары республикалық деңгейде қаралатын болады, бұл елдегі аграрлық саясаттың тиімділігін арттыруға мүмкіндік береді.
Jsk ақпараттық агенттігі