Мемлекет басшысы жариялаған «Жұмысшы мамандықтарын дәріптеу» бастамасы еліміздегі қарапайым, бірақ маңызды еңбектің қадірін арттыруға бағытталған. Бұл бағдарлама арқылы тек ірі кәсіпорын қызметкерлерінің емес, күнделікті тұрмыстың тірегін ұстап тұрған қарапайым еңбеккерлердің де еңбегі қоғам назарында екенін көрсетеді. Қала мен ауылдың дамуына, инфрақұрылымның тұрақты қызметіне өз үлесін қосып жүрген адамдар – осындай нағыз еңбеккерлер. Кентау қаласында да күнделікті тұрмысты қамтамасыз ететін, тұрғындардың өмірін ыңғайлы етуге бағытталған көптеген еңбек адамы бар. Солардың бірі – «Кентау Сервис» МКК қазандық және турбина цехының аға машинисті Шынар Шекербекова.
Түркістан облысында туылып, 1993 жылдан бері Кентау қаласында тұрып келе жатқан Шынар еңбек жолын 2007 жылы қарапайым көмекші ретінде бастаған. Уақыт өте тәжірибе жинап, тәжірибелі мамандардан үйреніп, сенімділік пен жауапкершілікпен жұмыс істей отырып, аға машинист дәрежесіне жеткен. Оның айтуынша, бұл жол оңай болмағанымен, әрбір кезеңі өз жемісін беріп, кәсіби өсуге мүмкіндік берген.
«Менің жұмысым жауапкершілігі жоғары әрі қызықты. Әр күнде жаңа қиындықтар мен міндеттер бар. Бірақ мен өз мамандығымды бағалаймын, осы жерде көп нәрсе үйрендім және зейнеткерлікке дейін осы қызметте болуды қалаймын», – дейді Шынар.
Ол үшін жұмыстың мәні тек тапсырмаларды орындауда ғана емес, жылыту жүйесінің тұрақтылығын сақтау мен тұрғындардың қолайлы өмір сүруіне тікелей ықпал етуінде жатыр. Қазандықтағы қысым, температура мен су деңгейі, турбиналардың үздіксіз жұмыс істеуі – қаланың жылу беру жүйесінің тиімділігін қамтамасыз ететін негізгі көрсеткіштер. Осы күрделі жүйенің тоқтаусыз жұмысын қадағалау, әрбір индикаторға мұқият бақылау жүргізу аға машинисттің кәсіби шеберлігі мен жауапкершілігінің нақты көрінісі. Ол әрбір күні жіті бақылау жасап, қала инфрақұрылымындағы ақаулардың алдын алады, қиындықтарды уақытында анықтап, шешім қабылдайды.
Бүгінде ол қазандық пен турбиналардың тұрақты жұмысын қадағалайды. Қала тұрғындарына жылу мен жарықты үздіксіз жеткізу оның күнделікті тынымсыз тірлігіне толығымен тәуелді. Себебі қазандықтағы қысым, температура мен су деңгейі, турбиналардың жұмысы – қаланың жылу беру жүйесінің тиімділігіне тікелей әсер етеді. Осы күрделі үдерістердің үзіліссіз жұмыс істеуі аға машинисттің шеберлігі мен мұқияттығына байланысты.
Сонымен қатар, Шынар – үлгілі ана. Үш баланың тәрбиесін қоса атқарып, жұмыстағы жауапкершілігін де толық орындайды. «Жұмыс та, отбасы да – екеуі де маңызды. Балаларым мені қолдайды. Сол сенім мені жұмысыма барынша адал болуға ынталандырады», – дейді ол.
«Кентау Сервис» МКК – қала инфрақұрылымының маңызды бөлігі. 1934 жылдан бері үздіксіз жұмыс істеп келе жатқан кәсіпорын бүгінде 15 мыңнан астам тұтынушыға қызмет көрсетеді. Күн сайын бірнеше қазандық пен турбина тоқтаусыз жұмыс істеп, қалаға жылу мен жарық жеткізеді. Бұл жүйенің сенімділігін қамтамасыз ететін – білікті мамандардың кәсіби еңбегі, оның ішінде Шынар сияқты тәжірибелі, жауапкершілігі мол, өз ісіне берілген еңбеккерлер.
Кентау қаласы қыс маусымын қиындықсыз қарсы алу мүмкіндігі – білікті мамандардың еңбегінің арқасы. Солардың бірі – өз ісіне адалдығы, жауапкершілігі және мұқияттығымен ерекшеленетін Шынар Шекербекова. Әйел бола тұра, ол ер азаматтармен тең еңбек етіп, қаланың жылыту жүйесінің дұрыс және тұрақты жұмыс істеуіне нақты үлес қосып келеді. Оның кәсіби шеберлігі мен табандылығы жеке жетістіктермен ғана шектелмей, қаланың инфрақұрылымын тұрақты сақтап, тұрғындардың жайлы өмір сүруіне тікелей ықпал етеді. Осы тұрғыдан қарағанда, Шынардың еңбегі – нағыз еңбек адамының қадірі тек кәсіби жетістігімен емес, қоғамға қосқан қажырлы қызметімен бағаланатынын көрсететін жарқын дәлел.
Jsk ақпараттық агенттігі