Ордабасы ауданы бойынша жалпы білім беретін мектептерде жастар арасында құқықтық мәдениетті қалыптастыру, салауатты өмір салтын насихаттау және зиянды әдеттердің алдын алу мақсатында “Заң мен тәртіп” қағидатын ілгерілету бағытында бірқатар түсіндіру кездесулері тұрақты түрде өткізіліп келеді. Солардың бірі Темірлан ауылының Мәдениет үйінде өткен “Бұзушылыққа тоқтам” және “Нашақорлыққа жол жоқ” атты кездесу болды.
Шараға мектеп оқушылары мен олардың ата-аналары қатысты. Кездесу барысында мамандар жасөспірімдерге психоактивті заттар мен есірткі заттарының зияны, олардың денсаулыққа, психологиялық дамуға және әлеуметтік өмірге тигізетін кері әсері туралы толық ақпарат берді. Сонымен қатар ата-аналарға балалардың қауіпсіздігін қамтамасыз ету, дұрыс өмірлік құндылықтарды қалыптастыру, сенімді қарым-қатынас орнату және балалардың бос уақытын тиімді ұйымдастыру маңыздылығы түсіндірілді.
Кездесудің негізгі мақсаттары: Жасөспірімдер мен ата-аналарды нашақорлықтың қауіптілігі мен салдары туралы хабардар ету, нашақорлықтың алдын алу жолдарын түсіндіру, жастарды салауатты өмір салтына баулу, оқушыларды психоактивті заттардан алшақ болуға шақыру.
Кездесудің міндеттері:
Нашақорлықтың қоғамға, денсаулыққа және психологияға тигізетін зиянын нақты деректермен түсіндіру;
Оқушыларға өз өмір жолын дұрыс таңдауға көмектесу, өмірлік құндылықтарын айқындауға бағыт беру;
Ата-аналарға балаларының тәрбиесінде бақылау мен сенімді қарым-қатынастың ерекше рөлін жеткізу.
Кездесуге Ордабасы аудандық прокуратурасының прокуроры Төлеметов Шыңғыс Қыдыралыұлы, Ордабасы аудандық білім бөлімінің әдіскері Алимкулов Нуртас Курманович, сондай-ақ Ордабасы аудандық полиция бөлімінің кәмелетке толмағандар ісі жөніндегі аға инспекторы Көпбосын Ақтөре Садықұлы қатысып, нашақорлықтың алдын алу жолдары, ата-ана мен бала арасындағы сенімді қарым-қатынастың маңызы туралы баяндамалар жасады. Сонымен қатар қатысушылар нақты өмірден алынған мысалдарды талқылап, өздерін қызықтырған сұрақтарына толық жауап алды.
Бұл кездесулердің басты нәтижесі – жасөспірімдер мен ата-аналардың есірткіге қарсы санасын қалыптастыру, салауатты өмір салтының құндылығын түсіндіру және қауіпті әдеттерден алшақ болуға шақыру. Мамандар мұндай шаралардың тұрақты түрде өткізілсе, қоғамдағы нашақорлыққа қарсы бірлік пен жауапкершілік деңгейін арттыратынын атап өтті.
Салауатты ұрпақ – жарқын болашақ кепілі.
Өзіміздің және жақындарымыздың амандығы үшін зиянды әдеттердің алдын алу жолында бірге әрекет етейік!
Jsk ақпараттық агенттігі