Отырар ауданы – өз тарихында талай күрделі кезеңдерді бастан өткерген, рухани құндылықтарды ерекше бағалайтын өңір. Бұл аймақта елдің бірлігі мен ынтымағын сақтау бағытындағы жұмыстар әрқашан да басты назарда. Қоғамдық келісімді нығайту, ұрпақ тәрбиесін дұрыс жолға қою, ауылдағы ауызбіршілікті арттыру мақсатында атқарылып жатқан шаралар жыл санап көбейіп келеді. Әсіресе, қазыналы қариялардың ақылы мен аналар кеңесінің тәрбиелік бағыттағы еңбектері аудан тұрғындарының әлеуметтік-рухани өмірінде айрықша маңызға ие. Осы бағыттағы жұмыстардың жалғасы ретінде жуырда Отырар ауданында Қазақстан халқы Ассамблеясы жанындағы Ақсақалдар және Аналар кеңестерінің көшпелі отырысы ұйымдастырылды.
Жиынға облыстық қоғамдық даму басқармасының «Қоғамдық келісім» КММ Кентау қалалық филиалының басшысы Бақытжан Әшірбаев, Отырар аудандық «Қоғамдық келісім» кеңесінің төрағасы Шайырбек Айжарықов, сондай-ақ ауыл тұрғындары, жас буын өкілдері мен түрлі қоғамдық ұйымдардың мүшелері қатысты. Кең көлемде өткен кездесудің басты мақсаты – ел ішіндегі татулықты сақтау, ұрпақтар сабақтастығын нығайту және қоғамдағы бейбітшілік пен тұрақтылықтың мән-маңызын түсіндіруге бағытталды.
Көшпелі отырыста «Татулық пен келісім – халық даналығының мәңгілік аманаты», «Ел қауіпсіздігі – тыныштық пен тұрақтылықтың кепілі» атты маңызды тақырыптар талқыланды. Бұл бағыттағы ой-пікірлердің әрқайсысы қоғамда бейбіт өмір сүрудің маңызын айқындап, көпшілікке құнды рухани бағдар берді. Ақсақалдар халық санасында ежелден қалыптасқан түсінік – «Ынтымақ бар жерде ырыс бар, береке бар» деген түсінікті тілге тиек етіп, ел ішіндегі ауызбіршілікті сақтау – әрбір азаматтың жауапкершілігі екенін айтты.
Отырыста сөз алған ардагерлер елдің ынтымағы мен бірлігін сақтау жолындағы өз ой-пікірлерін ортаға салып, жастарға өнегелі ұсыныстарын жеткізді. Олар ұлттық құндылықтарды дәріптеу, дәстүр мен дінді дұрыс түсіндіру, отбасылық тәрбиеге көңіл бөлу, ұрпақтың санасына адамгершілік қасиеттерді сіңіру туралы кеңінен әңгімеледі. Қариялар жастардың бойында елге деген құрмет пен жауапкершілік сезімін қалыптастырудың маңызын ерекше атап өтті.
Аталған кездесуде Аналар кеңесінің өкілдері де сөз алып, қоғамдағы әйел-аналардың рөліне тоқталды. Олар отбасы татулығы мен бала тәрбиесінің әрбір ананың жүрегіндегі мейірімнен басталатынын айтып, «Тәрбиелі ұрпақ – татулықтың тірегі» деген пікірді алға тартты. Сонымен қатар, ауылдық жерлерде қалыптасқан өзара көмек көрсету дәстүрін жалғастырудың, көршілік қатынастарды нығайтудың қажеттілігін еске салды.
Басқосу барысында қатысушылар ел ішіндегі әлеуметтік мәселелерді де ашық талқылап, оларды шешу жолдары жөнінде ұсыныстарын білдірді. Атап айтқанда, жастарды бос уақытын тиімді өткізуге бағыттайтын мәдени және спорттық іс-шараларды көбейту, ауыл жастары арасында еріктілік қозғалысын дамыту, сондай-ақ қоғамдық келісімді нығайтуға бағытталған тұрақты кездесулер өткізіп тұру туралы ойларын ортаға салды.
Жиын соңында қатысушылар ел ішіндегі татулық пен өзара түсіністікті нығайту – тек мемлекет немесе қоғамдық ұйымдардың ғана емес, әрбір отбасы мен әрбір азаматтың ортақ міндеті екенін атап өтті. Ақсақалдар мен Аналар кеңесі алдағы уақытта да осындай шараларды жалғастырып, қоғамдағы тұрақтылықты сақтау жолында белсенді жұмыс атқаратынын жеткізді.
Бұл кездесудің маңызы – өткеннің өнегесін бүгінгі ұрпаққа жеткізе отырып, болашаққа жарқын көзқарас қалыптастыру. Өйткені бірлік – елдің берекесі, татулық – қоғамның тұтастығының кепілі. Отырарлық ақсақалдар мен Аналар кеңесінің осындай бастамалары ауданның рухани дамуына, тұрғындардың бір-біріне деген құрметін арттыруға септігін тигізері сөзсіз.
Jsk ақпараттық агенттігі