Ордабасы ауданының тұрғындары үшін аса өзекті мәселелердің бірі – қоғамдық көліктің қолжетімділігі мен жайлылығы еді. Соңғы жылдары бұл бағытта жүйелі жұмыстар жүргізіліп, нәтижесінде Ордабасы ауданында қоғамдық көлік паркін жаңарту ісі толықтай жүзеге асты.
Әлеуметтік маңызы бар елді мекендерді бір-бірімен байланыстыратын 11 бағытқа қызмет көрсететін 13 жаңа автобус сатып алынған болатын. Бұл – аудан халқының күнделікті қатынау жағдайын жақсартуға бағытталған маңызды қадам.
Алғашқы кезеңде жаңа автобустардың 6 данасы пайдалануға беріліп, тұрғындардың игілігіне ұсынылған еді. Қалған 7 автобус қажетті техникалық құрылғылармен – бақылау камералары, электронды билет жүйесі, GPS навигация және қауіпсіздік жабдықтарымен толық жабдықтау үшін біраз уақытқа кейінге қалдырылған.
Ауданға осы автобустардың соңғы легі жеткізіліп, толық дайын күйінде тапсырылды. Нәтижесінде аудан аумағындағы барлық маңызды бағыттар толық жаңартылған қоғамдық көліктермен қамтылды. Жаңа автобустардың іске қосылуы – тұрғындардың жолға жұмсайтын уақытын қысқартуға, қызмет сапасын арттыруға және қауіпсіздікті қамтамасыз етуге елеулі үлес қосады.
Аудан әкімдігі бұл бастаманың бұдан былай да жалғасатынын атап өтті. Қоғамдық көлік қызметін біріздендіру, сапасын жақсарту және тұрғындардың сұранысына сай ету – алдағы жұмыстың негізгі бағыты болмақ.
Jsk ақпараттық агенттігі