Орта және шағын кәсіпкерлік – еліміздің экономикалық дамуының негізгі тірегі екені анық. Ордабасы ауданында бұл саланы қолдау мен дамыту бүгінгі күннің басты басымдықтарының бірі болып отыр. Аудан әкімдігі кәсіпкерлердің бастамаларын әрдайым қолдап, оларды тиімді жұмыс жасауға жағдай жасауға ат салысады.
Жылыжай құрылысы – ауыл шаруашылығын дамыту үлгісі. Ордабасы аудан әкімі Азат Әбдіғалиұлы аудан аумағында өнім өндіріп, кәсіп ашуға ниет білдірген жергілікті кәсіпкерлер мен шетелдік инвесторлардың бастау алған жобаларын көріп, жұмыс барысымен танысты. Ең алдымен ол Шұбарсу ауылы аумағында жүріп жатқан жылыжай құрылысына барды.
Бұл жылыжайлар «Ауыл аманаты» бағдарламасы аясында бой көтеруде. Бағдарламаның басты мақсаты – ауыл шаруашылығын қолдау арқылы тұрғындардың тұрақты табысқа қол жеткізуіне жағдай жасау. Осы бағытпен 36 адамға 15 сотықтан жер телімі бөлінген. Қазіргі уақытта олардың 16-сы құрылыс жұмыстарын бастап, өз жылыжайларын салуда.
Аудан басшысы кәсіпкерлердің жылыжай құрылысы барысындағы мәселелерін тыңдап, тиісті сала орынбасары мен бөлім басшыларына нақты тапсырма берді: кәсіпкерлерге қолдау көрсету, қажетті материалдар мен кеңестерді уақытылы қамтамасыз ету. Мұндай қолдау ауыл шаруашылығын дамытудың тиімді жолы болып табылады.
Жылыжай құрылысы тек өнім өндіруді арттырып қана қоймай, ауыл тұрғындарын жұмыспен қамтуға да мүмкіндік береді. Сондай-ақ, бұл жоба жергілікті азық-түлік нарығын сапалы өніммен қамтамасыз етуге де бағытталған.
Шетелдік инвестиция – индустриялық дамудың белгісі. Аудан әкімдігі кейін Бадам индустриялық аймағындағы алюминий бұйымдарын өндіру жобасына атбасын тіреді. Бұл жобаны шетелдік «CENTRAL ASIA ALUMINIUM» компаниясы қолға алған. Аудан басшысы өндіріс нысанында болып, негізгі қондырғы жабдықтардың орнатылу барысын, олардың пайдалануға берілу процесін бақылады.
Индустриялық аймақтағы жобаның мақсаты – заманауи технологияларды пайдаланып, өңірде жаңа өндіріс орындарын ашу, шағын және орта кәсіпкерлікті дамыту. Жобаның іске асырылуы жергілікті тұрғындарға жұмыс орындарын беріп, экономиканың өсуіне үлес қосады. Сонымен қатар, шетелдік инвестициялардың тартылуы ауданның инвестициялық тартымдылығын арттырып, бизнес ортаны дамытуға серпін береді.
Кәсіпкерлікке мемлекет қолдауы – тиімділік кепілі. Ордабасы ауданында кәсіпкерлерге мемлекет тарапынан көрсетіліп жатқан қолдау бірнеше бағытта жүргізілуде: инвестициялық жобаларды іске асыруға жағдай жасау, жер телімдерін бөлу және кәсіпкерлікті дамыту үшін қажетті кеңестер беру, инфрақұрылыммен қамтамасыз ету және жаңа өндірістерге қолдау көрсету.
Аудан басшысы Азат Әбдіғалиұлының айтуынша, кәсіпкерлікті дамыту – тек аудан экономикасын көтеріп қана қоймай, жергілікті тұрғындарды тұрақты табысқа жеткізудің, әлеуметтік жағдайды жақсартудың негізгі жолы болып табылады. Жылыжай және индустриялық жобалар ауданның экономикалық дамуына нақты үлес қосып, кәсіпкерлердің кәсібін әрі қарай кеңейтуге мүмкіндік береді.
Jsk ақпараттық агенттігі